Pathian Nih A Cawi Khawhlomi Lungnganpi A Ser Kho Hnga Maw?

 (Can God make a rock so big he can't pick it up?)

Hi biahalnak hi Baibal sianginn tampi ah hal tawnmi asi. Keimah lila zong an ka hal bal caah ka ruahnak le ca ka relmi hnihkhat chungin tlawmpal ka von tial venak asi. A biapi in Pathian a um lo, tiah a zummi (Atheists) pawl nih ‘aa kalhmi biahalnak’ (paradox question) hi Pathian a um lonak langhter duh ruang le chim duh ruangah an chuahpimi asi.

Hi biahalnak an tuahnak a sullam cu: Pathian cu zeizong vialte tuah khotu asi, ti hi Khrihfa asi mi paoh nih nan pom. Zeizong vialte tuah khotu Pathian asi ahcun ‘A cawi khawh lomi lunglianpi a ser kho hnga maw? A ser khawh lo ahcun zeizong vialte tuah khotu Pathian asi lo. Cun, a ser khawhmi, a cawi khawh fawn lo ahcun a thawngmi Pathian (all-powerful) asi lo. Cucaah, Pathian cu a sining aa kalh i a sining aa kalhmi cu biatak asi kho lo, cun Pathian zong a um lo,’ tiah an ti.

Zeitindah kan leh kun hna lai?

A hmasabik ah, ‘Lung’ hi tah khawhlo tiangin a nganmi a um lo (there is no such rock that is infinite in size). Tah khawhlo tiangin a nganmi ‘lung’ cu ‘lung’ a si ti lo. Lung a sinak (definition) he a ralkah. Zeicatiah, Pathian lawnglawng hi tahkhawh lomi (infinite) cu asi. Cucaah, hi biahalnak hrimhrim hi illogical asi. Asinain, kan fianchin khawh nakhnga tamdeuh in tial khawh ka von izuam hmanh lai.

Pathian Sining (God’s Nature)

Hi bantuk biahalnak a chuahnak a ruangbik cu ‘Pathian Sining’ kan fian lo ruangah asi. ‘A thawngmi Pathian’ hi Pathian sining lakah pakhat asi. “A thawngmi Pathian—Zeizonng vialte tuah khotu” a sinak kha a sining lengah a um lo. Cu, a sining chungah cun zeizong vialte a tuah khawh.

Tahchunhnak: Minung sining kan ngei caah kan kal kho. Cucu, minung sining lakah pakhat asi. Cu kan sining cu kan thlau kho lo. Zeicatiah, ‘kal’ khawhnak kha kan sining chungah aa tembawh chih. Kal kho loin um sihlaw, tlamtling lonak pakhat khat ngei mi kan si hnga.

Cu bantuk in, Pathian hi a sining kalh in rian a tuan bal lo. Lih zong a chim bal lo. Lih a chim khawh lo ruangah Pathian a sinak kha a tlau hlei lo. Lungnganpi a ser lo ruangah zeizong vialte a tuah kholo, tinak asi hlei fawn lo. A sining hrawh in zeihmanh a tuah lomi Pathian asi deuh. Cu ti ka chim tikah ‘a thawngmi Pathian’ asilo tinak asi hlei fawn lo. A sining he aa kalhmi a tuah ahcun biatak asi hnga lo i biatak asilo ahcun Pathian zong asi fawn hnga lo. Pathian cu a mah le mah aa kalh bal lo i a sining he aa ralkah in zeihmanh a ser bal lo.

 

Lungnganpi hi a um kho hnga maw?

Kil dangin, von zoh than hmanh sih. Pathian nih a cawi khawhlo dingmi lung ser tatak ding sisehlaw, a mah nakin a ngandeuh mi ser a hau hnga. Pathian cu tahkhawh lomi (infinite in size), asi fawn. Donghnak zong a ngei lo. Zeizong vialte sertu, Liannganbik asi. A cawi khawh lo ding lung ser ding ahcun a mah nakin a nganmi ser a hauh caah, Pathian sining he aa ralkah. Cun, ‘lung’ timi dictionary nih ‘a hakmi thil pakhat bantuk le tah khawhmi phunkhat’ bantukin a fianter. Cucaah, tahkhawhmi thilri pakhat kha tahkhawh lomi (finite in size into infinite in size) ser kha logical ning asi lo. Pathian sining ahcun a diklomi, a um kholomi asi. Pathian nakin a ngandeuhmi lung cu um taktak sehlaw ‘lung’ zong asi ti hnga lo. Cucaah, lungnganpi hi a um kho lo.

Hi biahalnak hi a hramthok tein a mah le mah aa kalhmi asi. A um kho lomi, asi kholomi biahalnak asi. Biahaltu nih aa tinh bikmi cu Pathian hi a mah le mah kalhter i Pathian a um lo tiah, langhter kha asi. Sihmanhsehlaw, an mah le mah an ituk. Mah thutnak thingnge hau bantuk an si.

Ravi Zachariah chimmi, “Nuva an um. Voikhat zing cu an pa nih, “Kan nu ka thi” ati i a tho duh lo. An nu, “na thi lo. Na thih lo ruangah pei na holh khawh hi” a ti. An pa nih, “Ka holh ruangah zeidah ka nunnak? Khoi ka nunmi cu ka piah?” tiah a hal. An nu cu a ar ko. Psychiatrists pawl le lungthinlei thiamsang pawl, a va auh hna. An mah zong nih cun na thi lo, na thluak zong a tlamtling ko. Na thi le na sining vialte tlamtling tein an tha dih, an ti zongah a duh lo. “Ka thi ko” ati i a it peng rih. A hnu bikah, ‘Minung cu an thi a chuak kho timi asi, cucu, na zum maw?” tiah an hal. A pawng ummi vialte nih ‘Minung lawng an thi chuak kho, minung lawng an thi chuak kho’ tiah an au hnawh tikah “Aw, ka zumh” a ti hna. Cu le caangka, sii-bawi pakhat nih a thahri ah sii-thim in a von sawh le thi a chuak thluahmah tik ah “khah, na thi lo hih, na thi chuak hih’ an ti. Aa remh, aa remh than le, “A va mak ve, vawlei cung thil vialte lakah ka khuaruahhar bik bak asi. Mithi zong an thi chuak kho ve hi teh” a ti than an ti.

Pathian a um lo, tiin a chim lengmang mi hna hi ‘Pathian a um lo,’ tiah an chimmi an zumh khi siloin “an ititer bia asi” (pretending). Atheist pakhat nih, “Darwinism ka zumhnak hi Darwinism nih ka zumhnak vialte a phi a ka pek dih ruangah a si lo. Ka duhning paoh in ka um khawh ruangah asi deuh’ tiah a chim.

Baibal hi “Tuah” (Do) le “Tuah hlah” (Don’t) a tamtuk ruangah a zul huam lo i ‘Pathian a um lo’ tiah an dirpinak asi.

Relchih ding: Psalm 14:1; Psalm 53:1.

Kan pehthan te lai.