Lai zuunhla (Love song) kong iceih
fatinte, Solomon hla hi kap-hnih group nih kan ilaak peng veve. Khatlei nih, “Baibal
chungah Somolom hla vialte khi zuun hla (Love song) lawngte an si ko,” tiin
zuun hla uar mi pawl nih zuun hla tanhnak ah kan hman. Khatlei ve zong nih, “Zuun
hla a tuah ruangah a hnu ahcun Israel rampi tiang a tlukpi,” tiin a
thatlonaklei in an ti ve. Solomon Hla hi ‘zuun hla’ (love song) sawhsawh men i
kan ruahmi hi a poi ngaingai. ‘Zuun hla’ sawhsawh asi lonak phun tampi in
fianter khawh asi. Cu lakah cun, cangfang sullam (literal meaning) ning zongin
fianter khawh asi. Cun, cafang ning bak si loin a phen ah sullam dang a ummi
ning zongin (tahchunhnak in hmanmi sullam—allegorical meaning) fianter khawh asi.
Phun dang cun, thlarua he aapehtlaimi sullam a ngei (It has spiritual meaning).
Asinain, a tu kan von ifian cio ning le
a sullam kan von i lehning—cucu, Solomon le Shunamite an iduhdawt kong le zuun
hla in an ilehnak le hur duhcuainak kong lawng kan ruahmi hi an si lo. Nungak
le tlangval karlak ah iduhdawtnak kong hmanh khi asi rih lo. Nu le va karlak ah
iduhdawtnak hla in phuanmi hna an si.
Pakhatnak ah, Solomon
Hla cu, ithit-umhnak cu a thiang tukmi asi i Pathian nih chiti a thuhmi asi—a
cohlanmi asi i amah Pathian hrimhrim nih a dirhmi asi. Cu, ithit-umhnak cu nu le
pa karlak ah dik tein iduhdawtnak he sermi/tuahmi chungkhar asi (Gen 2:24-25).
Cu a thiang tukmi thit-umhnak phung nih a tem cangmi nu le va hna karlak ah
ningzahnak zeihmanh a um lo. Pumkhat an si cang—flesh of my flesh, bone of my
bone timi kong kha a chim duhmi asi. Cucu, a nupi hmasabik, Shunamite kha a
dawtnak langhternak caah a phuah hnawhmi hla an si. Nupi tampi a ngeih hlan le
dawtnak hmangin sualnak chung i a tluk hlanpi ah a rak tialmi an si i Israel
pen hram aa thok kaa hrawngah tialmi/phuahmi an si.
Pahnihnak ah,
Jesuh Khrih le Khrihfa bu kong zong chim duhmi asi fawn. Jesuh Khrih nih
zeitluk in dah Khrihfa bu a dawt, timi fianternak asi. Zeicahtiah, Khrihfa bu
Khrih nupi asi—‘Bride of Christ’ (Efesa 5:22-23; Biathlam 21:2; 22:17).
Asinain, hi ilawhnak (analogy) hi thuk tukin le faktuk balte in lak khawh asi
lo caan zong a um ve.
Solomon Hla nih aa tinh bikmi cu “Pathian
nih a sermi chungkhar—a thianghlimmi nu le va ithit-umhnak le dawtnak taktak he
dirhmi le sermi” kha upat tein tuah le zulh ding asi.
Cucaah, Solomon Hla hi zuun hla (love
song) sawhsawh asi lo. Cu pinah a nupi dang tampi hna he an ileh i an sakmi hla
sawhsawh le a donghnak ah sualnak ah a tluktertu hla asi lo. Ka chim cang
bantukin hi hla hna cu a pennak hramthok kaa hrawngah rak phuahmi an si. A
ngaingai ahcun Solomon Siangpahrang nih hla tampi (fung 1005—1 Siangpahrang
4:32) a phuah. Cu vialte chung cun a tu kan ngeihmi lawng hi telhchih an si. A
dang vialte hna cu Baibal ah telhchih an si lo. Zeiruangah dah telhchih an si lo,
timi tu cu Baibal thiamsang nih an chimning aa dang cio. Biakam hlun siseh,
Biakam thar siseh, Baibal i cohlan an si khawhnak dingah tahfung tampi an ngei.
Cu bantuk ‘tahfung’ ah an tlin hnu lawnglawngah Baibal ah cohlan an si.
Jesuh Khrih zong nih Septuagint a hman
lio ah zeitik hmanh ah, Solomon Hla hi ‘zuun hla’ (love song) sawhsawh hmuh in
a hmu bal lo. Paul zong nih a hmu bal fawn lo (Mathai 5:18; 16:17; II Timote
3:16). Cu caah, ‘zuun hla’ kong kan iceih tikah zeilei hmanh ah Solomon Hla hi chirhchan
ah ilaak tuk hlah usih. A dang deuh in iceih sih, i ruah sih, ti kha ka von
tial duhmi asi.
Solomon Hla hi ‘zuun hla’ sawhsawh asi
ahcun ‘zuun hla’ uar lo pawl nih cun a kau hmanh an kau lai lo, ti a fiang. ‘Zuun
hla’ a uar pawl zong nih ‘zuun hla’ duh sawhsawh ah an kau i an rel ve a fiang.
Thuk deuh ah kal usih. Solomon Hla hi ‘zuun hla’ sawhsawh asi lo, Baibal asi.
Pathian Bia asi.
A herh ahcun fiangdeuh le tling deuh in
tial khawh kan izuam than te lai.
0 Comments