Jesuh vs Muhammad: Aa Dang Ngaingai Mi Lam Pahnih

                    

 

Jesuh vs Muhammad: Aa Dang Ngaingai Mi Lam Pahnih

Philosophy a cawng mi paoh nih cun theih cio asi lai, tiah ka ruah. Cucu, ningcang tein bia-al ziathiamnak (logical argument) he a pehtlaimi ‘aa kalh kho lomi phunglam’ (the law of non-contradictory) hi asi. A fawinak cun, ‘aa kalhmi thil pahnih kha an dik veve kho lo’ ti khi asi. Phundang in cun, ‘pakhat’ kha ‘pakhat’ asi lioah ‘pahnih’ asi kho lo. Phundang in chim than ahcun, thil dik pakhat a um. Cu thil dik cu, aa khat lomi ‘aphi’ pahnih in na ruahdamh—tahchunhnak ah ‘pakhat asiloah pahnih asi lai’ tiah na ruahdamh. Cu na ruahdamhmi chungah cun ‘an pahnih’ te cun an dik veve kho lo. Pakhat a dik ahcun a dang pakhat cu a palh hrimhrim lai. Asiloah, an pahnih te in an palh khawh veve fawn—‘hihi maw, khikhi dek’ asiloah ‘hihi zong asi lo, khikhi zong asi lo’ (either this…or that (or) neither of….them). Cucu, the law of non-contradictory timi cu asi. 

Vawlei pumpi ah zultu a ngei tam bik cu Jesuh le Muhammad an si lai dah? A fawinak in chim ahcun, zungzal nunnak hmuh duh ruangah zulh an si. J le M cu an sining, an cawnpiakning, thawnnak an ngeihning zoh tikah an i ralkah ngaingai. Pakhat nih a dum a timi kha pakhat nih a raang, tiah a ti. Cucaah, ‘aa kalh khawh lomi phunglam’ kan hman i cuai kan thlai hna a herh. Cu ning cun an pahnih ning cun an dik kho hrimhrim lo, tinak asi. Cucaah, aho deuh hi dah zungzal nunnak lam hruaitu asi i aho zawhmi lam dah a dik deuh i kan zulh awk asi? timi zohfel a herh.

A tanglei ah an sining le an cawnpiakning tlawmpal tein kan langhter lai i duhthimnak cu pumpak cio nih kan tuah a hau. 

1. Jesuh cu nu thianghlim (virgin) Mary sin in a chuak. Muhammad cu nu thianghlim (virgin) nih hrin mi asi lo. Jesuh kong hi kan mah Baibal lawng hmanh si loin Quran hrimhrim nih nu thianghlim Mary sin in a chuahnak kong, fiang tein a tial. Quran nih nu min pakhat te lawng a langhter. Cucu, Mary (Miriam) asi. Muhammad nu min zong a tial lo, a nupi le min zong a tial hna lo. Quran Dal 4,6 ah tlawmpal Mary kong a tial. Dal 19nk hna cu a tlangtaar ah ‘Miriam’ (Mary) ti asi. Islamic zumhning ah cun, Mary cu pa a hngal bal lomi, nu thianghlim asi i a nung bu in van ah laak a sinak kong zong Quran nih a tial. Quran nih Muhammad nu min zong a telh lo. 

 

2. Jesuh cu a sualnak a ngei lo (I Pet 2:22). Muhammad cu misual asi (Quran 40:55; 48:1-2).

3. Muhammad nih tukthahnak kong le amah hrimhrim nih minung tampi nunnak a laak lioah Jesuh nih cun mi cungah zaangfahnak le ngaihthiamnak kong a chim—khatlei bengh ahcun khatlei ichit rih ding tiangin. Kan ral caah thlacam ding zong ….. 

4. Muhammad nih huatnak kong a cawnpiak lioah Jesuh nih dawtnak kong a chim—na innpa kha nangmah naa dawt bantukin na dawt ve lai….tbk.

5. Jesuh cu thihnak le nunnak cungah nawl a ngeitu asi ko nain ahohmanh a that bal hna lo. Muhammad cu minung tampi a thah hna.

6. Muhammad cu amah nunnak humhak duh ruangah minung hawi tampi a thah hna i an thi. Jesuh cu mi vialte nih nunnak kan hmuh khawh nakding ah amah nunnak ‘lungtho’ tein a pek.

7. Jesuh cu nupi a ngei lo. Muhammad cu nupi 20 leng a ngei i pakhat hna cu kum 9 lawng asi rihmi hngakchia nu asi.

8. Jesuh nih cun Pathian ka si, a ti. Muhammad nih cun minung ka si, a ti.

9. Muhammad nih cun khuaruahhar thil pakhat hmanh a tuah bal lo/kho lo. Jesuh nih cun Khuaruahhar thil tampi a tuah hna—mizaw a damh, mizeng, miphaar, mitcaw a damh hna pinah mithi tiang zong a thawhter than. Quran hrimhrim zong nih Jesuh tuahmi khuaruahhar thil tampi a tial—a chuah in nihnih asi ah a holh kho, tlak a laak i vate a ser. Cun thaw a pek i cu tlak vate a siammi cu a nung, tiah Quran nih a tial pinah a dang khuaruahhar thil tampi a tuah, ti zong a tial chih fawn.

10. Muhammad cu a thi i a tho ti lo, a tlau len. Jesuh cu a thi nain a chim cia bantuk tein a tho than. Khrihfa lawng si loin Muslim pawl hrimhrim nih Jesuh cu a tho than i a ra than lai, tiah an zumh. Muhammad cu zeitik hmanh ah a raa than lai, an zum lo. 

Motor le vanlawng te hna hmanh von chim lo, cawleng hmanh nih lam cu a ngei va si kaw, zungzal nunnak vancung khua phanhnak ding tiang ahcun ‘lam’ cu a um hrimhrim. Lam lo cun zungzal nunnak vancung khua cu kan phaan kho lai lo. Cu lam dik cu ahodah asi hnga? Asi ahcun ahodah kan zumh deuh awk le kan zulh ding mi cu asi lai—Jesuh maw Muhammad dah? Jesuh nih cun Johan 14:6 ah ‘Lam le Biatak le Nunnak Ka Si……..’ a ti. Muhammad nih cun a chim bal lo.