Jesuh Khrih A Tho Than Tatak Maw?

Jesuh Khrih A Tho Than Tatak Maw?

Baibal caang tampi nih Jesuh Khrih thawhthannak kong an tial

(Mat 28:1-20; Mk 16:1-20; Lk 24:1-53; Jn 20:1-21:25; Lamk 1:1-11). Hi vialte kan rel tikah Jesuh Khrih thawhthannak kong phun tampi in hngalh khawh asi.

1.       Zultu Nun A Thlen Hna: Jesuh Khrih zultu nunnak ah khuaruahhar in thlennak a um (dramatic change). Midang cu um rih hna seh, “na thihnak ah ka thi ve lai,…ka ngamhtuk..’ a ti tu Peter hmanh kha Jesuh an tlaih kaa ahcun Marcus hnakhaw hmanh naam in a tuk ngamtu asinain mibu sin a phanh tatak ahcun a thirh—voithum bakte, a hlawt. Zultu pawl kha thih cu an rak ngamh taktak lo. An zaam, an ithup. Innkaa an ihrenh khumh. Sihmanhsehlaw, a hnu ah cun Jesuh Khrih caah thih an ngamh tuk. Thawngtha karhternak caah an nun an rak thaap ngam dih. Cucu, zeiruangah dah asi? Jesuh Khrih thawhthannak ruangah asi.

2.      Paul Nun A Thlen: Paul cu Judaizer asi. Mifim cathiam asi. Judaism a tanh tuk ruangah Khrihfa bu tiang a rak hrem hna i zabu 1 lioah Khrihfa nih an tihbikmi pakhat a rak si. Kha lio chan i biaknak le ram uktu naklei ah nawlngeitu phu Sanhedrin timi chungtel zong a rak si. Ciruang kongah aa porhlaw ngam. Nawlbia kong ah soi awk um lo. Fimthiamnak kongah ahohmanh nih tluk ci. Thinlung kongah lungtum bantuk. Judah mi phun bak asi nain Rom sinak zong aa ngeih chap rih. Jesuh a huatning hi a mak. Asinain, a hnu ahcun Jesuh Khrih caah a nunnak a thaap ve. Zeiruangah? A thi i a thothanmi Jesuh Khrih he Damuscus khua haukaa an itonnak nih a nun a thlen. “Kei cu Jesuh Khrih caah temmi sal ka si (a bond-slave for Christ Jesus—Rom 1:1),” ati. Phundang in, Judaism a tanhtuk ruangah a lungkhongmi vialte Jesuh Khrih he an iton hnu ah cun hin-cho-hmuk ti chung paih bang, a zu vek. “Khrih ca lawngah ka nung i Khrih caah ka thi,” a ti.

3.      Thlan A Lawng: Tahan thlanmual thial a rak si lioah a thihnak 20 leng a luan cangmi ka pu thlan kan hlai i a luruh te pawl an um rih. Jesuh Khrih cu Judah nithla relning in nithum te lawng thlan chungah a um. A zultu pawl nih an fir sual ah, tiin ralkap nih an veng chap. Asinain, thlanchung an va zoh tikah a rak lawng. Nithum chungah cun a ruh vialte a rak rel dih manh hnga maw? Zeitihmanh in a rel dih manh ding asi lo. Vancung mi nih, “A tho cang” a rak ti hna (Mat 28:5-7). Cu pinah ralkap pawl hrimhrim nih a tho than tatak an hngalh nain tangka an pek hna i chim lo dingin an kaa an phih hna ai! Cu zong cu a hnu ah zultu pawl nih an phun vek hna. Mi hrokhrawl tlangbawi pawl mu…

4.      Mi Tampi Sinah A Lang: Mat 28:5, 9; 16-17; Mk 16:9; Lk 24:13-35; Jn 20:19, 24, 26-29; 21:1-14; Lamk 1:6-8; 1 Cor 15:5-7).

5.      Jesuh Khrih Hi Tho Than Tatak Hlah Sehlaw: (a) Jesuh Khrih hi thihnak in tho than hlah sehlaw, Khrihfa kan um hnga lo. Kan zumhnak vialte hi pawkpalawng asi hnga (1 Cor 15:12-15). (b)  Jesuh Khrih hi tho than hlah sehlaw, misual caah a in mi thihnak hi pawkpalawng le man ngei lo asi hnga (1 Cor 15:16-19). (c) Jesuh Khrih hi tho than hlah sehlaw, zungzal nunnak hmanh hi a um hnga lo (Jn 3:16). Zeicahtiah, Baibal nih Jesuh Khrih a zummi poah cu thihnak in zungzal nunnak ah thawhter an si lai, ati (1 Cor 15:20-23). Jesuh Khrih cu tho than taktak hlah sehlaw, a mah hmanh a thawh lomi pi cu a mah kan zumh ruangah cun zeiruangah dah thihnak in zungzal nunnak ah cun kan va thawh len hnga?

6.      Jesuh Khrih Cu Pathian Asi I A Tho Than Tatak:  Buddha a thi, a tlau lan. Mohammed a thi, a tho than ti lo. Guru Nanak, Confucius, Krishna le a dang prophet pawl zong an thi, an tho than ti lo. Jesuh cu, a taksapum in a tho than. Vancung a kai lio bak, a zultu pawl nih an mitfang in an hmuh. Pa Pathian orhlei kam ah a thu. Jesuh Khrih thawhthannak nih zultu vialte an nun a thlen dih hna. Tihnak in ralthatnak  ah an ithlen dih. Peter kha ruat hmanh usih! Ka chim cang bang, Ar voikhat khuang hlan hmanh ah Jesuh voithum tiang a hlawtu nih khan dawh, vailam cungah biktaling thlai hmanh a tih bak lo khah! Ruat hmanh! Jesuh kha  tho than tatak hlah sehlaw, zultu pawl nih khan Rom cozah pawl le Judah pawl kha deh hna usih,  tiah Jesuh ruak kha rak fir taktak hna sehlaw, Jesuh a tho than taktak ko, tiah an mah nunnak tiang pekin Jesuh kong an va chim huam len hnga maw? Va tuah tatak ko hna sehlaw, midang an hlen hna lawng hmanh siloin an mah le mah an i hlen pei asi cu. Ahodah, a mah le mah aa hleng bal?  A thi mi Messiah cu zeidah a thathnemnak a um? Cucaah, zultu hna nih nunnak pekin thawh thannak kong thawngtha bia an chimmi nih hin Jesuh a tho than tatak ko, ti a fiangter chinchin. Paul kong ruat rih sih! Jesuh Khrih le Khrihfa dohtu a rak si nain Jesuh Khrih he aa ton hnu in Jesuh caah temmi sal ka si, a ti khah! Cucu, midang nih tawn chawmmi tuanbia asi lo. Amah Paul bak nih a chimmi bia asi. Jesuh cu a ruh zong a rel lo, a fir zong an fir lo. Lihnih ruang zongah a ruak a tlau lo. A chim bantukin a tho than tatak ko.

A donghnak ah, Jesuh Khrih a thawh than tatak ko a fiannak cu, “Ka nun a thlen” (He changes my life). “Jesuh Khrih hi ka hmu bal lo caah a thawh than zong ka zum lo,” ti hlah. “………..a ka hmu lo bu zongin a ka zum khawh rih mi cu thluachuak mi an va si dah” (Jn 20: 29).

Hi thlawmpal te ka tialmi hmanh nih Jesuh Khrih cu a tho than tatak ko, timi a langhter.