NIHIN TIANG A LUNGDONG LO

Pathian cu um sertu asi i kan nih tlak kan si. Lungdong lo tein nifatin
a kan sersiam zungzal.

Robert Jastraw nih, ´Science and Astronomers´ timi a cauk ah galaxy hi billion 15 tluk hrawng an um i galaxy pakhat nih a ngeihmi arfi hna cu zatuak in billion 20 cio hrawng cu an um, tiah a tial. Cun, TOI (Times of India) ah Scientist pakhat nih, arfi hi durbing zong in hmuh khawh lomi tampi an um rih lai, ruahdamh tikah hin vawlei cung these nakin vancung i a ummi arfi hi an tam deuh lai, tiah a tial. Vawlei aa merning hi second pakhat ah 250 km tluk rang in aa mer. Ruahlopi in second pakhat dir sual sehlaw, a merning a rang tuk caah a thazaang (force) a cak tuk lai i vawlei pi hi mitthep kar ah a kuaman dih lai, tiah Robert Jastraw nih a chim. Pathian thilsermi khuaruahhar tuk ruangah scientist tampi a piangthar mi an um. Bawipa thilsermi hna hi ruah lengmang ah hin khuaruahhar lo awk an tha hrimhrim lo.

Asinain, Siangpahrang David cu a zeihmanh a poi lo. A khuaruah zong a har lem lo. Pathian cu pei asi fom cu, a ser ve ko lai hme teh. Hi tel a ser lo ah biak awk tel a tlak hnga maw? tiah zeirel lo ngai phun in a um. A chap rihmi cu minung caah cun arfi koko hmanh hi rel le theih thlu awk a tha lo. Asinain, Pathian nih cun a ser lawng hmanh si loin Salm 147:4, ´Arfi kha a rel dih hna i an dihlak in min a bunh hna,´a ti. David khuaruahhar tertu thil cu Salm 8:3-4 ah fiang tein a von tial (mah tein von rel cio u).

Pathian nih minung a rak ser ah hin mak taktak in a rak ser. Saram dang sawhsawnh bantukin a fak ser lo. Salm catialtu nih 139 ah ''I was made in secret, and skillfully wrought…'' tiin a tial, 'i dawh te le i rem tein' a kan ser. Skillfully timi cu 'a duh paoh si ko seh, chuak ko seh, hman awk tha paoh ah' ti phun khi asi lo. "Hman awk tlak asi pinah mi nih zoh duhmi 'aa va dawh ve' tiah thangthatmi asiloah mah hi cu a thiam bakmi nih a tuahmi asi' timi theih khawh ding tiang i sersiam kha skillfully nih a sawh duhmi cu asi.

Kan kut nih rawl a von laak bak in kan kaa hna automatic bakin a rak i aang ve cu mu. Kan kaa cip sehlaw, khoika dah rawl kan rawn hnga ti. Rawl einak khan kan phanh paoh ah kan rawl taammi a lo deuh. Chim ding hi a tam tuk.

Kan thluak hi hna hi a sawhsawh a rak si lo. Mit nih hmuh khawh lomi hri nih a tuam dih (invisible string), hmuh khawh lomi cu hmuh khawhmi von sisehlaw, vawleipi hi a vel khawh lai, an ti. Kan thluak that a fiannak cu Adam sual i a tluk hlan ah khan Pathian nih saram von rat pi hna in minsak ding asi. Adam cu thil min bunh aa olh lawlaw khi si. Aa olh lawng hlah, voikhat a chimmi,vom, cakei, sai, caw, rang, ......automatic bak in a chimmi kha aa chingchiah viar. A thaizingah a philh hlei lo. Cu tluk cun Pathian nih minung thluak hi tha in a siam. Computer Hard Disk nakin a let tong tamtuk in a tlummi a tam.

Minung chungah cell hi billion 30 (an i khat cio hna lo) naktlawm lo a um, an ti. Cucu, minung nih hmuh khawh lomi an si i an hmetuk caah durbing (microscope) lawngin hmuh khawh an si. Cu tluk in a hmemi cell pakhat te chungah cun protein timi hi 1 hnu ah zero 200 chia law 

(100000,0000000,00000000,0000000000,0000000000,0000000000,0000000000,000000000,000000000,00000000,000000,000000,000000,0000000,000000,00000,000000,00000,00000,0000000,000000,00000,0000,0000,00000,00000,00000,000,000,000,000,000,000,000) hi zat hi a hmemite cell pakhat chungah protein a ummi asi. DNA aa siamning le a riantuan cawlcanghning an zoh tikah vawlei cung scientist le engineer hna khuaruah a har, hi bantuk in DNA design a um ti in. Cu lei pang cu von chia than rih sih.

SteadyHealth nih a tuakning cun pa nih voikhat a ci a thlah ah khin 15-20 million tluk a chuak i khoi maw chel ahcun cu naktam deuh in a chuah caan zong a um, tiin a tial. Cu vialte minung lakah cun champion kan rak si cang cu mu. Kan nu pawchung kan isem hlan khan dawh million 20 hrawng lakah a thawng bik, a cak (the champion) kan rak si cuh. Mi sawhsawh kan rak si lo. Pathian nih hin timh ciammam te le ralring te le dawh ngai in a kan sermi kan rak sinak fiang tein kan takpum zoh hin a fiang tuk. Nifatin nunnak ruah ah maw na lung dong sual lai ci. Pathian nih timhtuahnak le timhpiakmi ngei bu tein an sermi na si, ti kha philh hlah.

Kan ziaza le bang cu a tu tiang a lung dong lo, a kan remh peng rih. Van le vawlei le zeizong vialte hna cu zarhkhat lawng a rau. A bia kaa khat in,´um hna seh,´a ti i a hong ummi lawngte an si. Asinain, kan nih (nang le kei) cungah cun nihin tiang tiang a lung dong lo, lungsau tein a kan sersiam peng rih. A dawtnak vel a donghter bal lo. Cu ti i lungsau tein a kan sersiam cu amah muilo in sermi kan si caah amah bantuk si than a kan duh caah asi (Efesa 5:1).

By
Henry NawlthangbikHlawnceu

Øverst på formularen

Nederst på formularen