Habakkuk 1:1-11: Pathian, khoidah na um?
#Cancer zawtnak nih kan dawttuk mi hna nunnak a kan firpiak. Caan sau hmanh nun hlan ah kan dawttukmi fanu fapa an liam. Kan ruahnak hmanh a tlin deuh hlan ah kan ibochan tukmi nu le pa, ruahlopi in an liam.
#A dik lo ningin sual puh ruangah thih hlanlo thongthlak tuar ding. A hmaanlo ning bakin kanmah hmun le hma asi ko mi inn area cuh....tangka a ngeih ruang le bawi a va len khawh deuh ruangah kanmah nih hmuh ding bak asi ko mi “cunglei bawmhnak” khuadang nih an co.
#A bu in buaibainak ruangah khua chung inn tiang in ikhanghpiak le tukthahnak phunphun chuah.
#Kan zumhnak kong chim ruangah Pathian riantuantu missionary hna thongthlak, meikhangh, tukthah le hngawng tan hna an tong.
#ISIS nih an zumhnak ruangah zei sualnak hmanh a ngei lomi, Khrihfa an si ruang le an zumhnak an pom khawh lo ruangah, chungkhar le hngakchia tampi an thah hna.
“Thil thalo, thil diklo, sualnak .....lawngte” “A kenkip le a kaangza ah zaang-ennak lawngte...”
#Hi kong hi, biahmaithi ah ka tial cang bantuk Khan, Prophet Habakkuk zong a rak buai tuk ve. Chun-zaan in a paihmi biahalnak a rak si ve.
#Habakkuk 1:2-4
Maw Bawipa, zei can dah nangmah cu kan auh lengmang lai i let loin na ka um lai? “A kenkip ah zaang-ennak lawng a um ko,” tiah na sinah ka au, Sihmanhsehlaw khamhnak
zeihmanh na tuah hlei lo. Zei can dah ka au lengmang ko rih lai? Zeicahdah thatlonak hi vialte hi na ka hmuhter i mi nih fahnak an inmi cu na zoh sawhsawh men ko? Rawhralnak le zaang-ennak nih an ka chuahhnawh, Remlonak kha a chuak isiknak kha a tam. Cucaah nawlbia cu san a tlai ti lo i biading cu teitu a si kho ti lo; thatlonak nih khan miding mi cu an fimneh hna i cucaah biading cu merh lengmang a si ko cang.
Pathian cu a dingmi, athami Pathian asi ahcun thilthalo a tlunter? Ziah! dinlonak le thatlonak nih dinfelnak a bawhkhuh? Ziah! zaang-ennak in amah mithim hna tei an si?
Pawngkam in dohnak le tihraamnak nih kan nunnak a thuivor lioah le kan lakah a fel bik le a ding bik, tiah ruahmi hmanh kha zaang-ennak ruangah lunghrinh in a um lioah “Ziah! Pathian hi a daih?” Ziah! dinlonak nih dinnak a tei cu a duh?
Hi lio caan ah hin khoidah Pathian a um? Ziah! a dai? Pathian hi a um hmanh a um taktak hnga maw? Big question mark (?) Where are you, Oh, God!?
Pathian cu kan biahalnak ruangah aa dang hlei lo, a hme hlei lo i a derthawm hlei fawn lo. Kan lunghrinh sual hmanh ah a thinphaang lo i a lau hlei lo. Aa thleng ballo mi Pathian a sining cu amah kel peng asi.
Prophet Habakkuk zong nih a rak lunghrinh bal ve. Ka pawngkam ah hin, “zaang-ennak, thatlonak, fahnak, rawhralnak, remlonak, le eihmurnak lawng siloin biading cu merh le koih lengmang asi i miding cu teitu an si ti lo, mithalo nih nemnet hnawh in an um zungzal. Bawipa, zeicandah leh loin na ka um lai?” tiah Habakkuk nih Pathian cu a rak hal ve tawn.
A halmi kongah Pathian a thinhang lo. Sual zong a phaw lo. A halmi tu a leh i ruahchannak a pek. Pathian nih cu ruahchannak cu a fianter tikah Habakkuk caah khuaruahhar tuk asi i a zum hmanh a zum lei kho lo (Hab 1:5).
Kan pawngkam thil cangmi ruangah lungtuai le lungawtawm in Bawipa bia na hal caan a tampi kho? Pathian nih an zawnruat peng i na hmailei caah zeizong vialte thatnak in a khaang zungzal (Rom 8:28). Cu a khaan chungmi cu zeimawzat lawng kan hmuh khawh rih caah kan fiang rih lo kho men. Asinain, a nih nih cun a dihlak in a rak kan hmuhpiak chung cang. Cucu, kan iruahning nakin a ngan deuhmi thil an si.
Nihin ah cu a kan timhpiakmi cu kan chim sehlaw a that tuk ruangah a zum hmanh kan zum phah hnga lo.
Ruah awk:
* Nihin ah na pawngkam ah zeibantuk thil a cangmi ruangah dah Pathian na lunghrinh i biahal na duh?
* Zeitik ah dah Pathian nih na nunnak ah thilthalo chungin thiltha a chuahter?
* Zeidah Pathian nih nihin ah ka timhpiak seh, na ruahmi asi?
By
Henry Nawl Thang Bik
Tikhuangtum
0 Comments