Habakkuk: A 7-Day Devotional

 #Habakkuk: A 7-Day Devotional

------------------------------------

Biahmaithi

Nichiarte ti awk in tuk-kahnak thawngpang theih asi. Bomb a puak ruangah chia-tha zeihmanh a hngal rih lomi hngakchia tampi an thi. Hliamhma le zawtfahnak phunphun tuar mi tampi an um. Cu lawng hlah! Kokek in a chuakmi harnak ruangah inn le lo, minung tampi nunnak a liam.

Cu lioah cun, mihrokhrol, mi neknei le mizertiang tampi nih thatlonak, eihmuarnak le thil thalo an tuahmi vial cu a theih cu chim hlah, cu bantuk minung ko cu an ngandam khun, an thangcho khun, hmunhma an ngei khun, thangthat an tong khun i an rum an lian khun. Hi thil hi midang chim loin Laimi Khrihfabu zong nih a ton cuahmahmi thil asi. Pathian hi athami, adikmi le zumhawktlakmi Pathian asi ko ahcun zeiruangahdah hi bantuk thil hna hi a onh ko hna hnga? Zeiruangahdah thil tha kha thil thalo nih a bawhkhuh cuahmah lioah hin cawlcaang loin a zoh sawhsawh ko hnga? Hi bantuk thil a cang lioah hin khoikahdah Pathian hi a um hnga? Hmurka hmanh nih a tlinh lomi biahalnak dong loin kan thinlung le ruahnak ah aa zel cio ko lai dah?

Prophet Habakkuk zong, hi kong hi chun-zaan in a rak paihmi le a rak buaipi tukmi biahalnak a rak si. Nichiarte ti awk in Pathian sinah biahalnak a rak tuah ve. Amah chan lioah a rak hmuh-tonmi thil diklo nih a khuaruah a rak harter hringhran. Pathian hmanh a rak lunghrinh phah, ‘Ka biakmi le ka zumhmi Pathian hi atha tukmi le ading tukmi Pathian asi ko ahcun zeiruangahdah thil thalo a tuahtu hna cungah dantatnak a tlunter hnga lo’ tiin. Cu ruangahcun Pathian sinah atu le atu biahalnak a rak tuahnak asi. Asinain, ‘Pathian nih a ka leh te men lai,’ tiah Habakkuk nih a ruahmi le Pathian nih a pekmi lehnak (aphi) cu phundang pi an rak si.

Pathian cu sermi thil vialte cungah nawlngeitu le uktu asi bantukin amah nih a timhmi caan ah amah duhning tein rian a tuan zungzal ko. Ramri a ngeimi minung fimnak nih cun Pathian timhmi le khuakhaan cu a hngal kho thluh hrimhrim lo.

Habakkuk bantukin Pathian kha fian thluh hnu ah zumh le bochan kan hau lo. Kan itimh awk zong asi lo. Zeizong vialte a fian hnu ah Habakkuk nih a kan cawnpiakmi cu, ‘Pathian cu aa thleng ballo mi Pathian asi i hlanlio i rian a tuanning bantuk tein nihin a mi hna sin zongah aa dang hlei lomi Pathian asi’ ti asi.

#Note: Habakkuk cauk dihlak in caan rem um ahcun peh khawh thuahmah kan izuam lai i zarhkhat ah dih kawh kan izuam lai! Caan na ngeih ahcun rak bih than te.

By

Henry Nawl Thang Bik

Tikhuangtum