Habakkuk 1:12-17: Na Ruahnak An Hleen Tuk Tikah
=====================
A hleice in ramthumnak ka phanh hnu in ka hon fiang khunmi cu “bill” kong hi asi. USA lei ummi kan hawi le nih “bill, bill, bill....” tiah thla dih lai hrawng i an hmurka he aa then bal lomi kha ka hnathlam in ka cing rih. Atu cu keimah pumpaak zong nih ka hon tong i ka fiang tuk ve cang.
#Tahchunhnak: Rian na ngei ti lo caah tangka/phaisa hmuhnak na ngei lo. Zeitindah, tu thla “bill” ka pek lai, tiah khuaruahhar taktak in na um bu in thla 1/2 hrawng cu na nawicawt khawh — na “bill” pek ding a tam ko nain har ngai in, Khrihfabu hna na cawi hna caah....
Thla 2 hnu ahcun rian na hon ngei than. Bill pek ding ka ngei cang lai, tiah hnangam ngai in na um. Bill a tlami von zoh na tih ti lo. Asinain, “bill” a tlami na hon zoh taktak cu, “na mit vei ngaw in na au ko...” Naa ruahning asi ti lo, an hleen tuk cang. Cu hlan ah Inn man, cozah nih, an in bawmh tawnmi kha, “kan in bawm ti lai lo” tiah caa an in kuat chap. Na sianginn man na ruahning lengin a faak. ‘Loan’ na rak cawimi, an in cawh chap rih!!
Ngandamnaklei he pehtlai in sii-inn nih, “Cancer na ngei caah naa thlop a hau, cu zat cu a dih lai,” tiah caa an in thlak hoi. Na lau tuk ah mi mawtaw an “park” mi hnulei in na pahpiak hna i fak ngai in na khawn pinah nangmah mawtaw zong faak ngai in a hnulei a hep! Palik sinah an in “repawt” i na mawtaw, chikhat an in laakpiak. Mawtaw loin riantuan ah na kal kho ti lo caah na rianṭuannak company nih an in phuah than.
“Maw, Pathian.....Zei ko dah vawlei ah hin a cang!!”
Na ngandamnak kong na ruah ah na lungdong. Na “financial” kong na ruah ah na chimpit. Na rian kong na ruah ah na vansang! “Bill” ka pek khawh cang lai, tiah hnangam ngai in na um lioah na ruahning le na sining taktak cu mitṭhep ah hnu-hmai thlen in a um diam ai!
Hi bantuk thil hi tong taktak law, zeitindah na um hnga?
Prophet Habakkuk nih cun a ton bal. Cucu, Pathian nih a thimmi Israel miphun hna kha Pathian hngal lo mi ramdang mi hna nih an tuk hna, an thah hna i an hremmi hna kong kha asi. Sal ah hruai an sinak kong kha asi. Cu thil cu a mit in a hmuh tikah a khuaruahhar. Cu bantuk dantatnak cu Israel miphun nih an ton dingah a ruat lo. Zeicahtiah, Babylon cu Pathian a hngal mi an si lo, Pathian zawmhtaihtu an si. “Zeitindah, hi thil hi acang khawh? Ziah! Pathian nih a onh taktak ko hnga?” tiah a ruahnak a hleen tuk caah Pathian cu bia a rak hal lengmang nak asi.
Israel miphun hi Bybalon nakin tha deuh ko hmanh hna sehlaw, Pathian nih aa ruahchanning hna tlukin an tha lo, an tling lo, sualnak an tuah, eihmurnak an tuah, i anmah chungah thleidannak a rak um ve. Cu an sualnak ruangah cun Pathian nih dan a tat hna.
Sualnak kan tuahmi paoh cu asi theng lo, zeimawzat cu kan biakhiahmi le duhthimmi a thatlo ruangah dantatnak maw asiloah harnak kan tong tawn.
Asinain, Pathian nih cun pa nih a fa le a dawt hna bantukin a kan dawt zungzal ko. A fa le cungah thiltha tlunter a duh zungzal tu zong asi. Cun, kanmah pumpaak kan tuahmi ruang le duhthiammi ningin kan cungah thilchia tlunter le tonter a kan onh. Cucu, a kan huat ruangah siloin amah kan hngalh khawh nakding caah asi.
* Nangmah pumpaak duhthiamnak le biakhiahnak athatlo ruangah nihin ah na tonmi harnak a um maw?
* A um sual asi ahcun zeibantuk dah an si?
* Tuzarh chungah zeitel thlen na duhmi a um maw?
Siaherhnak he,
Henry Nawl Thang Bik
Tikhuangtum
0 Comments