Habakkuk 2:1: ‘Ruahchannak He Hngah’ ti sullam cu……
==================================
Hlan lioah cun ramthatnak hmanh ah hin online cungin thil cawk a rak um lo. Thil cawk duh ahcun mah pumpaak kal hrimhrim a rak herh. Western Union in phaisa kuat zong hi naite lawngin a hong laar. Asinain, nihin ahcun online cungin a phunphun (duhmi paoh ti awk in) cawk khawh an si. Cozah zung he aa pehtlaimi thil kong hmanh kha pumpaak kal hau loin phone in hei chawnh in tlamtlinh khawh an si cang. Ramthangchonak hna ah cun cauk, hruk-aih, kedenh, musical intruments, bank card, … a phunphun le rianrang bikmi, atu bak ei colh khawhmi pizza hmanh khi phone in cah (order) khawh an si. Rianrang tein kan sinah an rak kuat colh tawn.
Cu lioah cun hi ti hin hei si sehlaw, ‘Angki man faak ngaimi online in na cah! Na inn he a naih biknak post-box ah kuat ding sisehlaw, an rak chiah in na mail ah thawngthanh ding hei sisehlaw, naa ruahning in a phaan kho ti lo. Na mail a tu le tu na bih nain zei notification ah zeihmanh na hmu lo. Asiloah na rak i manh lo tuk i na mail na check kho ti lo. A hnu ahcun thil dang na tuahnak le na buai tuknak ah thil na cahmi hmanh na philh thai law.’ Tahchunhnak ka laakmi hi sullam ngei lo ngaimi a lo.
Asinain, caan tampi cu Pathian he kan ipehtlaihnak ah hin a um kho ngaimi cu ‘hmuh kan duhmi le Pathian nih kan let seh,’ tiah kan duhmi a tam nain hmuh dingin kan rak i ready lo caan a um tawn. A hal kan thawng. Hmuh colh kan duh fawn. Kan hmuh colh lo tikah kanmah tein ka per, kan choi. A caan ahcun kan imanh lo tuk ruangah Pathian sin kan halmi hmanh kan philh tawn. Cucu, rang tukin a tlimi vawlei media pehtlaihnak nih minung le Pathian karlak pehtlaihnak, a kan hrawhmi thil cu asi. Aphi hmuh colh lomi thlacamnak cu Pathian nih a hngalh lomi le leh duhmi lomi thlacam ko an lo. Lungsau in ruahchannak he hngah kan huam ti lo.
Habakkuk nih cun Pathian kha lungthiang tein bia a hal. Tuchan holh cun thla a cam. A hal lawng siloin ‘zeitindah Pathian nih a ka leh lai,’ tiah ruahchannak nganpi he a hngah. Amah pumpaak hrimhrim kha ralring tein a rak um (Hab. 2:1).
Pathian nih hin thlacamnak paohpoah hi a theih dih ko dawkaw. Mahbalte, kanmah nih a rem kan tining siloin amah nih aa tlaak, a tining tuin a tlinter tawn. A caan ahcun kan hngah ve zong a herh. Asinain, Baibal nih ‘ruahchannak he hngah’ tiah a chimmi cu zeihmanh tuah lo pi’n kethluang buin hngah kha asi lo. Nifatin in zumhnak he Pathian hmai kawl peng ding kha asi.
Ruahchannak Nganpi he hngak rih ko! Na lungdong sawh hlah. Pathian cu kan thlacamnak leh awk ah a hnachet lo dawkaw.
• Pathian nih a ka let duh lo, tiin na lung an dongh cangmi thlacamnak a um bal maw?
• Habakkuk nih cun Pathian nih a leh dingmi a thlacamnak kha ralventu nih khua an cuanh bantuk he aa tahchunh. Pathian na hngahning na lungput kha zei he dah naa tahchunh ve lai?
• Nihin ah Pathian nih na thlacam an leh ve dingin na pumpaak dirhmun na remh duhmi a um maw?
0 Comments