Habakkuk 2:2-3: Bawipa, Ziah hi bantuk hi na dih cang lo?(Lord, why haven’t you stopped this?)

 Habakkuk 2:2-3: Bawipa, Ziah hi bantuk hi na dih cang lo?(Lord, why haven’t you stopped this?)

~~~~~~~~~~~~~~~~~~~

#a_devotional_message

ISIS nih Khrihfa tampi an thahmi hna le ruru hranghrang in khua an sakmi hmuh tikah thin a lin.

Zei chia le ṭha hmanh thlendannak a ngei rih lo mi hngakchia tete, bomb puah ruangah a thongza in an nunnak a Liam hmuh tikah tuk a sum, khuaruah a tam, ngaih a chia i thinhaang tuk ah hacang irial cio asi. Ziah, hi bantuk thil diklo hna hi Pathian nih a dihter colh lo? Hi bantuk diklo thil tuahtu hna hi a thah colh hna hnga lo? Zeiruangah dah aa thlaak duh lomi a lawh hnga? A big question!!

Mibu pakhat le pakhat karlak buaibainak le tuk thahnak kong, thawngzamh ca he aa ṭhen lo. Vawlei ah ram nuam bik le ram dai bik, pakhat le pakhat izumh biknak hmun Denmark koko hmanh ah Laimi nih ṭha te kan um ko bu ah namte sawh hna kan tong! Mawtaw pah zong kan tong! Inn bauhpiak zong kan tong! Rianṭuannak ah ram dang mi kan si ruangah namnet deuh mi zong kan si. Ziah, hi bantuk dinlonak hna hi Pathian nih a zoh sawh ko? Hi vawlei pi ah hin dinlonak a karh chin lengmang mi kongah Pathian cawlcanghnak a tlawm chin lengmang mi ko a lo!!

Cu bantuk cun Prophet Habakkuk zong nih a rak ruah ve. A pawngkam ah khuasa mi hna kha an sual i dinnak a ṭanhtu an rak um lo. Asinain, cu sual nak le ṭhatlonak hna kha ahohmanh nih zei ah an rel lo. Pathian lila zong nih dantatnak a tuah lo tikah a khuaruahhar pinah a thin zong a haang. Cu tikah Pathian sinah a halmi cu dinnak asi. “Bawipa, Ziah! Na daih peng ko!! Dinnak kha dinlonak nih a bawhkhawhmi hi zeiruangah dah na zoh sawh ko?” tiah Pathian kha bia tiang a chalhnak asi.

Asinain, Bawipa nih a lehmi cu, “Hngak ko rih, na ka halmi hi a tlin caan a um te hrimhrim lai. A rau lai lo” a ti (Habakkuk 2:3). Cucaah, aṭhalomi paoh cu an nung lai lo, a dingmi lawng an nung lai (Hab 2:4).

A caan ahcun Pathian hi a lungsau tuk ruangah a khulnuar tukmi ah kan ruah tawn. Asinain, cucu zaangfah thiammi Pathian asi ruangah asi. Peter nih cun, “Bawipa cu mi cheu hna ruah bantukin a biakammi kong ah a khul a nuar lo, nan cungah a lung a sau tu a si i ahohmanh lotlau loin an nun an ṭhinh nakhnga a hngah hna a si deuh,” tiah a ti.

Pathian nih sualnak le ṭhatlonak tuah te hna hi a onh caah asi hrimhrim lo, a lungsau ruang le veel a ngeih caah asi. Pathian nakin sual hua mi an um lo. ISIS nih Khrihfa an thah hna tikah Pathian nakin ngaihchia mi le thinhaang mi an um lo. Biakinn hna an hrawh tikah Pathian a ngaihchia tuk. Asinain, nikhat khat ahcun ṭhatlonak le sualnak vialte hna hi bia a ceih te hna lai. An dih donghnak an phaan te hrimhrim lai.

Cucaah Pathian nih Habakkuk cu, “Dai tein ṭhu law, chikhat cu hngak ko rih. Caan sau a rau lai lo” a ti.

Ruah_awk:

- [ ] Zeitik lio dah a hnu bik, “Pathian hi a khualnuar ve si” tiah na ruah caan asi? Cu bantuk na ton caan ah zeitindah na feel?

- [ ] Zeitindah nihin na relmi Habakkuk nih hin khua le ram caah siseh, hruaitu caah siseh, Khrihfabu le pawngkam ca’h na thlacam ning, an thlen? Asiloah na thlacam ning an remh deuhmi a um maw?

- [ ] Jesuh Khrih khamhnak na tinco ruangah na nun aa thlengmi pakhat tein na chim kho maw? Cun, cu kong cu teh tuzarh chungah hin na hawi pakhat khat sinah na chim kho hnga maw?