Zaruk sawmruk paruk (666) hi Laimi lawng si loin Khrihfa poahpoah nih kan tih.
Zeicahtiah, Baibal
chungah 666 cu sahrang number a sinak kha a kan cawnpiak. A hleice in Biathlam
13 nih sahrang le nal profet pawl kong tampi a chim. Cu sahrang (the beast)
number 666 kong cu phun hnih in a um.
Pakhatnak: 666 cu sahrang pumpak nih a ngeihmi number asi. Cucu, sahrang a
sinak langhternak kha asi. Pahnihnak: Cu sahrang number 666 cu mi vialte nih
thil cawk khawhnak dingah kan ngeih dingmi/pek dingmi chingchiahnak numbe asi
lai i cucu cal ah maw, baan ah maw, benh asi lai. Cu sahrang cu ‘Jesuh dohtu’—Anti-Christ
ti zongin auh asi (Biathlam 13:16-18).
666 sullam taktak, John
nih a fianter ning cun, ‘fimnak’ (wisdom) a sawh duh. Phundang cun, Anti-Christ
cu Jesuh Khrih le vancung mi vialte a hmanh a doh ngamtu asi caah ‘mifim,
mithiam, mithawng, hawi hlei in thil ti khawhnak a ngei mi asi” ti khi a sawh
duh. Vawlei tuanbia kan zoh tikah minung tampi cu Anti-Christ—666 number a
chuahpitu asi te lai, tiah rak ruahdamhmi tampi an um. Cu hna lakah cun, Ceasar
Nero, Ronald Wilson Reagan, Mikhail Gorbachev le RCM luthlai Popes tampi zong
an rak puh hna. America president a tuan balmi Barack Obama le ISIS hruaitu
lutlai Abu Bakr Albanghdadi zong puh mi chungah an itel ve.
Biathlam 13:18 nih 666
cu sahrang he aa pehtlaihmi number a sinak a tial ko nain zeitindah an ipehtlaih
ning asi, timi cu a chim lo. Baibal nih hmun tampi ah number 7 cu Pathian
hmelchunhnak ah a hman pinah nihin minung tampi zong nih lucky 7 kan ti i kan
uar ngaingai. Asinain, number 6 cu minung he aa pehtlaimi number asi tiin ruah
asi caah ka uar lo ngaingai. Zeicahtiah, minung cu niruk nii ah sermi asi i
Pathian hmaika ah misual asi. Cu ve bantuk cun, sahrang nih cun Pathian bantukin
a um lai nain number 6 (minung) cu Pathian hmaika ah sualnak ah a tla bantukin
sahrang zong Pathian hmaika ah a sung ve lai, tinak asi.
A donghnak ah ruah
dingmi pakhat te a um. Ka chim cang bantukin zaruk sawmruk paruk (666) hi Laimi
lawng si loin Khrihfa poahpoah nih kan tih dih. Inn khaan kan hlan zongah khaan
number 666 asi ahcun kan tih, camipuai phit zongah cabuai number 666 asi ahcun
vanchiatnak ah kan ruah. 6 aa telmi number poah cu kan lung a thiang lo, kan
tih i kan ruahhrup. Baibal nih sahrang number cu 666 asi a ti bu ah hlan Grik
in tialmi Baibal pakhat nih Biathlam (ancient
Greek manuscripts or the Book of Revelation) kong a tialmi ah cun sahrang
number cu 666 si loin 616 asi tiin a tial ve. Baibal nih a chimmi cu kan zumh
awk asi ko nain number 616 zong asi khawh ve ko lo maw, timi zong kan ruah awk
ah ka duh.
Ka chim duh bikmi cu number 666 kha tih tuk le thinphan tuk ding asi lo, kan ruahhrup tuk ding asi lo, ti hih.
0 Comments