ISIS (the Islamic State
of Iraq and Syria), ISIL (Islamic State of
Iraq and the Levant ti zong in auh asi)
cun, IS (Islamic State ti zongin auh asi fawn), naihrawng an umtuning le
cawlcanghning zoh tikah Khrihfa tampi caah khuaruahhar asi i caan donghnak caah
hmelchunhnak asi ko lai, ti zong an zumh phah. ISIS nih a hmanmi hriamnam,
phunghram le an mi tukthahning zoh tikah mi a raap i tuk a sum ngaingai ko.
Iraq le Syria lawng si loin vawlei cung hmun tampi zongah an pennak kauh an
timh. Khrihfa tampi caah khuaruahhar thil pakhat asi tin ruahmi zong ISIS nih
naite (Nov 13, 2015) ah Paris khuapi chungah an tuahmi kha asi. Cheukhat Khrihfa
hna cu an lung a dong. Cu lioah, a bikin tlangbawi (priest) pakhat hna nih cun
Pathian zong hi a um taktak hnga maw, ti hi ka lunghrinh a ti phah. An thil
tuahning hi vawlei pi caah tuksum asi ko.
ISIS nih Middle East ah
Khrihfa tampi an thahning ko hi tihnung le tuksum asi. Khrihfa pawl an lu an
tanning hna ruah tikah Biathlam 20:4 lung ah a hung chuak. Cucu, sahrang (Anti-Christ)
nih harnak caan ah a thahmi hna kong chim chungnak kong kha asi, “….Jesuh nih a phuanmi biatak le Pathian bia
an chim ruangah thahnak a ingmi thlarau hna zong kha ka hmuh hna. Sahrang kha
an bia lo, a milem zong an bia lo, an cal le an ban zongah Sahrang hmelchunhnak
kha an ngei lo. An hung nung i Khrih he cun siangpahrang bantukin kum thong
khat chung uktu bawi an si.” Cun, ISIS nih Israel ramri bakah Islamic cazoh
ifuntomnak a tuahmi zong hi cheukhat nih cun Khrihfa pawl fawi deuh in tukthah
khawhnak ding caah asi bik ko, an ti.
Baibal nih ISIS kong
fiang tein a chim chungnak cu a um lo. Baibal nih a phuanmi cu; ramkip ah
raldohnak a um lai, a ti (Mathai 24:6). Cun, Jesuh Khrih hrimhrim nih a mah a
zultu le a tanhtu hna cungah harnak le hremnak phunphun a tlung lainak kong kha
a chim (Johan 15:18-19). Cun, ISIS kong hi fiang tein Baibal nih a chim lo nain
2 Timote 3:1-5 hi von laak awk ah aa rem ngai, “Ni hmanung bik kha a pn phak tikah harnak caan a si lai ti kha philh
hlah. Mi cu anmah zawn lawng aa ruatmi, a hak a kaumi, aa phorhlawmi le lung a
puammi an si lai; an nu le an pa kha an zawmhtaih hna lai i an nawl an ngai duh
hna lai lo; lawmh a hngal lomi le biaknak zeihmanh i a rel lomi an si lai;
zaangfah an ngei la lo, mi zawnruahnak an ngei lai lo, mi thangchiat duhmi an
si lai, ruru-hranghrang in khua a sami an si lai i tih a nungmi an si lai;
thatnak kha an huat lai; hawi rawi a hmangmi an si lai, duhpaoh khuasa an si
lai i porhlawtnak in an khat lai; Pathian nakin nuamhnak kha an duh deuh lai;
kan biaknak phung hi a lenglei in an i tlaih lai, sihmanhsehlaw a chung i a
ummi thawnnak taktak kha cu an duh lai lo, cu hna cu hrial i zuam hna.”
Asinain, hi Baibal
caang pawl zong nih hin ISIS kong hi fiangte le
dikthler tein an chim chungnak
cu a um lo. Zeitindah caan dongh lai ah thil umtuning cang asi lai, timi tu an
kan chimh. Cun, ISIS ruangah kan khuaruahhar in kan thinphang awk a um lo. Zeicatiah,
atu nakin a fakmi harnak phunphun, vawlei cungah a um rih lai (Biathlam 6—18).
Cu ti si ah, ISIS hi
caan donghnak caah hmelchunhnak dik asi maw? Si hlah. Asi ah teh, ISIS hi caan
donghnak caah hmelchunhnak pakhat asi kho maw? Asi kho. ISIS cawlcanghning le mi an thahning nih
buainak ngan chin lengmang a chuahpi khawh i Baibal nih a chimchung bantukin
caan donghnak hmelchunhnak ralpi tiang, a chuahpi khawh, ti cu al hau lo asi
ko. Asinain, a tu lio ahcun vawlei dihlak ifuntom in ISIS an doh. Hi ifuntomnak
hi Baibal nih a chim chungmi (global government) zong asi khawhmi asi. Hi aa
funtommi ram hna nih ISIS an doh bantukin caan donghnak ahcun vawlei caah ral
asi mi Sahrang dohnak tiang zong kha a chuak khawhmi asi, tiah a zummi cheukhat
zong an um. Asi ahcun, ISIS hruaitu lutlai Abu Bakr Albanghdadi hi Sahrang (Anti-Christ) asi
kho maw? Asi khawhmi zong asi ko, a ti tu zong an um len.
A donghnak ah kan ruah
awk ah ka duhmi cu, ‘Kan hngah rih a hau. Kan zoh fel rih a herh. ISIS nih
zeitindah a cawlcangh le zulhphung dah an hman? Baibal nih chim chungmi caan
dongh kong he pehtlai in zeibantuk dah an tuah, ti kha zohfel a hau. Atu tiang
ahcun, ISIS hi Baibal nih a chimmi, “Zeitluk in dah minung hi an sual i
thinlung thatlonak zulh an duh” timi tlinternak le fianternak caah hmelchunhnak
pakhat bantuk sawhsawh asi rih (Jerimiah 17:9; Rom 3:10-18).
Nain, a hmaanmi pakhat
cu, caan cu a dong te hrimhrim lai, ti hi.
0 Comments