Khrihfa nih a mah le mah aa thah ahcun khamh asi thiamthiam lai maw?

Hi biahalnak hi keimah pumpak zong nih ka hal tawn lengmang hna. Cun, keimah le mah zong kaa

hal tawn i midang zong nih an ka hal tawn ve. Hihi minung cungah si loin Pathian cungah aa hngatmi deuh khi a rak si. Hi bantuk bia kan hal tikah minung kan biahal si loin Pathian kan biahal bantuk asi fawn—Pathian nih a tuahmi khamhnak kong, bia hal khi asi.

Ngaihchia ngai asi, tiah ka ruahmi cu cheukhat nih raltha tukin ‘mah le mah’ aa that mi cu hell ah an kal lai, tiah a chim colhmi hi asi. Cu ruangah cun, mi tampi nih mah le mah aa that mi poah cu (zumtu asi zongah zumlotu asi zongah) khamhnak sung dingin ruah an si, hell kal colh dingin ruah an si. Hi bantuk cawnpiaknak hi Baibal he aa kalhmi cawnpiaknak asi.

Baibal nih a kan cawnpiakmi cu Jesuh Khrih kha Bawi le Khamhtu ah kan von cohlan bak khan khamh kan si i zungzal nunnak pek kan si colh (Johan 3:16). Baibal ning cun, zumtu nih cun zungzal nunnak an ngei ti kha fiangte in kan hngalh (1 Johan 5:13). Zeicatiah, Pa Pathian dawtnak chung cun zeihmanh nih a kan then kho lo (Rom 8:38-39). Zeibantuk sermi thil hmanh nih Pathian dawtnak in a kan then kho lo. Khrihfa nih mah le mah aa thah zongah “mah le mah thah” cu sermi thil asi ve caah Pathian dawtnak cun a kan then kho hlei lo. Jesuh Khrih cu kan caah zungzal hrangah a thi cang. Zumtu dik cu a taksa der ruangah maw, thlarau der ruangah maw ‘a mah le mah’ aa thah ko zongah Jesuh Khrih thisen nih a sualnak vialte cu a khuhpiak dih thiamthiam.

Baibal tha tein kan zoh ahcun, mi pakhat khat kha vancung kuatkaa luh khawh ding le dinglo kha ‘mah le mah’ ithahnak ruangah asi lo. Cu nih cun ri a khiahpiak lo. Zumlotu nih a tuah (a mah le mah aa thah) asi ahcun hell tuandeuh ah a kal tinak khi asi ko (he does nothing but expedite to hell).  Cucu, a mah le mah aa thah ruangah hell a kal si loin Jesuh Khrih nih a tuahmi khamhnak a tinco lo/a cohlang lo ruangah asi (John 3:18). Cun, ruah awk a um ngai rihmi cu, mi pakhat khat nih a thih cuahmah lio ah zeidah a ruah, ti hi ahohmanh nih fiangte in hngalh khawh asi lo. Cheukhat pawl cu ‘an thihnak ihkhun’ ah biaruahnak an ngei i Jesuh Khrih Khamhnak a tinco mi zong an um. Cu bantuk thiamthiam in ‘mah le mah’ aa that mi zong nih a thih hlan deuh te ah a thinlung ithlen in Pathian sinah ngaihchihnak a ngei khawhmi asi. Cucaah, mah le mah aa that paoh cu hell ah an kal lai, timi ruahnak le mi cungah biakhiahnak kan ngeihmi hi cu ngol sihlaw, Pathian riantu ah chia ko usih (1 Samuel 16:7).

Zumtu caah mah le mah thahnak cu ‘mi zeihmanh nih lungretheihnak le lungfahnak in kan luat kho lo’ timi a fiannak asi ko. Satan cu a hramthok tein mithat/lainawng a rak si (Johan 8:44). Khamhnak sung le sunglo nakin Baibal ningin mah le mah ithah cu lainawng asi caah Pathian doh asi, a dik lomi asi. Mah le mah ithahnak nih kan harhnak le lungretheihnak aphi a chuah lo.Mah le mah ithah cu ralchiat bia asi.  Zumtu nih kan comi thlarau cu a ralchia lo pinah zumtu cu Pathian caah nun dingin fialmi kan si. Kan thihnak le nunnak tu cu Pathian kut chungah a um. Pathian lawnglawng nih nawl a ngeihmi asi. 

Bawipa Pathian nih nihin kan tonmi harhnak le lungretheihnak ruangah Salm catialtu sinah ruahnak a pekmi bantuk cu kan pe ve hram ko seh: “Zeicahdah ka ngaih a chiat? Zeicahdah ka lungre a theih? Pathian cu kaa bochan than lai i ka Khamhtu le ka Pathian cu ka thangthat than lai.”