Khrihfabu Tamtuk Hi Thancho Asi Maw?

~~~~~~~~~~~~~~~~~~~~~~~~~~~~~~~~~~

Kan tuanbia ah hrelh awk tha loin an kan chimhmi cu ‘khuahrum biaknak kong’ hi asi. Cu lioah cun dawtnak, zawnruahnak an rak ngei i zumhtlak tein khua an rak sa. Khrihfa kan hon si hnu ah tampi thanchonak a hong um chinchin. Zeimaw caan chung cu Khrihfa a rak pom kho lomi an rak um rih caah buaibai in an rak um. Nain caan sau a rau lo, rualrem tein khua an hong sa kho than. Doctrine kongah buai a rak um lo, an ti. Rammui riantuannak zeitluk in dah thazaang kan chuah khawh lai, ti kha an rak izuam deuh.

Naite khan Khrihfabu thar dirh rai a puang. Khrihfabu kuai le then a tamtuk tikah idawtnak le zawnruahnak a zor rup. Zumhnak kongah unau hmanh buai asi cang. Khrihfabu pakhat le pakhat ileng kai cu a biangbai cang. Khoimaw caan, crusade kai ding hmanh ah khin kan Khrihfabu i tuah asilo ahcun midang biakinn va pumh cu thlik a zum deuh. Aa thoknak cu Khrihfabu upa pawl rak irem lonak in aa thokmi an si. Cun, bu chuak le thial tlangrai a chuak hoi. “A bu tham ah khamhnak um lem lo,’ ti asi. “A bu ah khamhnak a um lo tham ahcun ziahhme ithial lalek cu a herh chan?” tiah vei nih cun a ti phah. Khrihfabu kan kuai rup le bu min a tam rup in kan milu a rak tam lem fawn lo. Kawlram milu 50+ million chungah hin 7-10% hmanh hi Khrihfa kan si hnga dek maw? Cu ah cun, kan ido i a chunglei in kan i ngiar ngaingai fawn hna.

Biaknak dang zong, an rak kuai lengluang ve ko. Hinduism, Islam, Buddhism te pawl zong hi. Nain, a dang tampi chim hau loin tulio Rakhine thil cangmi kong hmanh ah zeitlukin dah Muslims pawl le Buddhist pawl an rak itanh ti hi hngalh khawh an si. Kan nih cu Chritianity tangah kan um ko hna nain, RCM hna cu, UPC hna cu, Jehovah Witnesses hna cu, EAG hna cu, Baptist tham cu liberal…., Believers Church tham cu siangpahrang uknak,.… kan iti cio hna. Zeihuaha ah kan irel hna lo. Tutan Malaysia debate zong nih hin lungrualnak hngakin thenhmalnak le remlonak a chuahpi deuh te khomi asi.

Kum 2010 lioah Chennai ah khin biaknaklei hruaitu ngan pakhat nih bia a rak chimmi cu TOI thanhca nih a tial, “Vawlei cungah a doh bikmi hi India le Pakistan an si lo. Khrihfa kan si. Jesuh Khrih hi Pathian Fapa le vawlei Khamhtu asi, tiah an zumh khawh nakding ahcun Khrihfabu vialte hi rualrem tein kan um hmasa a herh,” tiah. Biaknak dang minung nih Khrihfa (Bu khat le Bu khat) kan irem lomi hi an theih. Kanmah hmanh kan irem khawh lo lioah biaknak dang minung va sawm cu a fawimi thil asi lo. Salm 133 “Unau rual i rem tein khuasak ti hi zeitluk in dah a that i a nuamh…” timi cacaang hi biakinn chung lawngah siloin a leng zongah tuah dingmi asi. Bu kip fonh in Mission Department asiloah Khrihfabu pakhat le pakhat buainak a um sual caan ah tlangtlatu bu, Khrihfabu pakhat aiawhtu minung pakhat hna um hna sehlaw, hmunkhat te ah riantuan tinak ngei kho hna sehlaw, tampi a kan funtom khawh lai.

Atu ning koko ahcun Lairam ah Khrihfabu tampi a ummi hi thanchonaklei kar hlannak bawmtu siloin dawntu pakhat phun ah a cang. Fiang deuh in chim ahcun Khrihfabu kip hruaitu upa lung ihmuh thiam lo ruangah aa thokmi asi. Hi bu khat le bu khat irem lonak kan dohlo ahcun zabu 21 minung caah tampi thanchonak a dawntu asi lai. Laimi cu kan vantha i 100 ah 100 ti awk in Khrihfa kan si pinah kan hrihhram kan zawt ahcun mi kan um lo. Mah lawngte kan si. Khrihfa kan si ruangah kan idawtnak a feh chinchin awk asi. Cucu, Baibal nih a kan cawnpiakmi zong asi fawn. Mi vialte nih Jesuh Khrih an zumh i an cohlan khawh nakding ahcun kanmah kan ifunton i lungrual te le daw tein khua kan sak hmasa a hau ve.

By

Henry Nawlthangbik Hlawnceu

Tikhuangtum